女朋友突然好急咁打畀我：「喂！快啲返屋企呀，我買咗嘢畀你呀！你一定鍾意㗎！」
我好奇問：「咩嚟㗎？畀少少Tips。」
佢：「你好鍾意玩嘅Game呀！～玩到成日唔理我嗰隻呀！」
我心入面即刻知係咩：「FIFA ！」
FIFA係一隻PS4嘅足球遊戲，嚟緊就出新版。
但以防中伏，我問清楚女朋友：「妳唔會買咗FIFA 17啩？新嗰隻係18喎⋯⋯」
女朋友好有信心咁話：｢18吖嘛，你女朋友咁叻點會買錯！？你快啲返嚟玩啦！」
為咗快啲收到我份禮物，我加快腳步，差啲亂過馬路，終於打開屋企大門。
見到枱上面⋯⋯放住嘅FIFA 18⋯⋯係一部足球機⋯⋯
「哈哈！鍾唔鍾意呀？我哋仲可以一齊玩，咁樣你就唔使掛住打機冇理我啦～」女朋友好興奮咁問。
「⋯⋯鍾⋯鍾意⋯⋯仲等咩呀，開波啦！」我拎咗粒波子放落部足球機度，開始同女友一齊玩呢部「FIFA 18」⋯⋯
Search